Jo vetëm merkato në hyrje, Juventusi përgatit listën e lojtarëve me ‘valixhe në duar’

Juventusi deri në këto momente nuk ishte treguar mjaft aktive në merkato, teksa Zonja e Vjetër ishte fokusuar te emërimi i trajnerit të ri. Tashmë, çështja e teknikut ka marrë fund dhe drejtuesit bardhezi së bashku me Mauricio Sarrin kanë nisur nga puna për të përforcuar ekipin në sezonin e ardhshëm. Juventusi duket shumë pranë transferimit të një prej mbrojtësave më të talentuar, Matijs De Ligt, ndërsa kanë mposhtur konkurrencën e Barcelonës dhe PSG.

Ndërkohë, pritet të ketë të paktën nga një afrim edhe në repartin e mesfushës e atë të sulmit. Mirëpo, përvçe merkatos në hyrje, kampionët e Italisë po mendojnë edhe atë në dalje. Janë jo të paktë lojtarët me valixhe në duar, duke filluar nga Huan Kuadrado . Kolumbiani ka oferta nga Seria A dhe Juventusi e vlerëson me 20 deri në 25 milionë kartonin e kolumbianit. Nëse një shifër e tillë mbërrin atëherë, klubi do ta pranojë ofertë, Në të njëjtën situatë qëndron edhe sulmuesi Mario Manxukiç dhe mesfushori Kedira.

Dy nga futbollistët më të besuar të ish-teknikut Alegri, tashmë me Sarrin nuk janë më të paprekshëm dhe në mundësinë e parë do të largohen. Ndërkohë, në dyshim mbeten Duglas Kosta dhe Matuidi. Për trajnerin Sarri, braziliani mund të qëndrojë, por nëse një ofertë prej 50 milionë eurosh mbërrin nga Parisi, atëherë Juventusi do ta marrë seriozisht në konsideratë. Sa i përket Matuidi, e ardhmja e tij varet nga afrimet në repartin e mesfushës, duke qenë se pjesë e skuadrës pritet të jetë edhe Rabio.

/Egi Çabeli-VipSport.al/