Gega: Faleminderit Partizanit, ishte periudha më e bukur e karrierës si trajner

Pak orë pas largimit zyrtarisht nga pankina e Partizanit, trajneri Skënder Gega ka dalë me një deklaratë publike drejtuar opinionit sportiv rreth vendimit të tij. Gega ka konfirmuar se kanë qenë arsye personale ato që e kanë shtyrë të marrë këtë vendim, ndërsa ka falënderuar të gjithë bashkëpunëtorët për atë që i kishin dhënë, ashtu si edhe tifozët e të kuqve për këtë vit historik.

“Prej një viti pata nderin dhe privilegjin të drejtoj Partizanin, ekipin ku unë fillova dhe e mbylla karrierën si futbollist. Këtë sezon në krye të pankinës të ekipit Partizani ka qenë periudha më e bukur që unë kam përjetuar si trajner, e mbushur me plot emocione dhe kënaqësi. Mbas 26 vitesh ja arritëm të rikthejmë trofeun kaq të munguar.

Për arsye personale kam vendosur të mos të jem më në krye të pankinës.

Dua të falënderoj:

Klubin Partizani,

Presidentin Demi për besimin dhe mbështetjen e tij gjatë gjithë kohës.

Drejtorin Olsi Rama për bashkëpunimin.

Të gjithë stafin, ekipin për punën dhe mbështetjen, për kënaqësinë që më dhuruan.

Tifozët e mrekullueshëm të Partizanit për mbështetjen.

Gjithashtu dua të falënderoj mediat dhe gazetarët sportiv.

Ju uroj të gjithë kolegëve të mi trajnerë suksese !

Me shumë respekt

Skënder Gega”.