FOTO / Portugalia fituese e Ligës së Kombeve, situata e Shqipërisë e Kosovës për edicionin e ardhshëm

Edicioni i parë i Ligës së Kombeve u mbyll zyrtarisht mbrëmë, me fitoren 1-0 të Portugalisë ndaj Holandës, duke u bërë fituesja parë e trofeut për turneun më të ri të UEFA-s. Për të parë turneun tjetër do të pritet vjeshta e vitit 2020, ndërsa fituesja e tij do të jetë në verën e vitit 2021.

Në ato dy vite do të mësohet edhe rrugëtimi i mëtejshëm i Shqipërisë dhe Kosovës. Kuqezinjtë e mbyllën edicionin në vendin e 34-t, pasi i shpëtuan rënies në Ligën D, kurse Kosova që në edicionin  parë siguroi ngjitjen dhe pjesëmarrjen në play-off, duke u renditur e 42-ta mes 55 skuadrave pjesëmarrëse.

Tani, të dy skuadrat gjenden në të njëjtën Ligë dhe në edicionin e ardhshëm, nuk është çudi që të përballen edhe në të njëjtin grup pasi në teori duhet të jenë në vazo të ndryshme. Sllovakia, Turqia, Irlanda dhe Irlanda e Veriut duhet të jetë vazo e parë e Ligës C në shortin që do të hidhet në janar 2020, meqë vijnë nga Liga B.

Bullgaria, Izraeli, Hungaria dhe Rumania do të jenë pjesë e vazos së dytë. Në vazon e tretë gjendet Shqipëria bashkë me Greqinë, Malin e Zi dhe Gjeorgjinë. Ndërkohë, Kosova gjendet në vazon e katërt të kësaj Lige, bashkë me Maqedoninë dhe Bjellorusinë.

Liga C ndahet në 4 grupe, ku 3 janë me nga katër skuadra e 1 me 3. /vipsport.al/