Formati i ri i Champions dhe kampionati shqiptar/ Nga Italia, Shqipëria noton mes skandaleve

Po përflitet gjithnjë e më shumë mundësia për të riformatuar formulën aktuale të Champions League, në mënyrë që klubet më të mëdha europiane të kenë mundësi përfitimesh stratosferike. Një ide e cila mbështet fortë nga presidenti i Juventusit, Andre Anjeli. Por, në votimin për ndryshimin e formulës pjesa më e madhe e skuadrave të Serisë A kanë qenë të pozicionuar kundër, ndërsa Milani, Interi, Roma dhe Fiorentina abstenuan. Mirëpo, me formatin e ri do të zvogëlohej mundësia e klubeve më të vogla për të marrë pjesë dhe në këtë formë gazetari italian Gaetano Moçiaro ka publikuar një listë me Federata të ndryshme dhe se si funksionon futbolli në atë vend.

Sa i përket Shqipërisë, gazetari ka theksuar problemin e licencimeve të klubeve për në Europë. “Kampionati shqiptar është aktualisht i renditur në vendin e 36 në Europë dhe është në periferi të Europës. Federata po përballet me një periudhë jo shumë të shëndetshme. Skuadra dominuese e viteve të fundit, Skënderbeu, ka marrë një skualifikim të gjatë, ndërsa shumë klube kalojnë kriza ekonomike. Për të mbajtur një klub, vlera është diku te 1 milionë euro, një shifër qesharake me klubet e tjera të Kontinentit. Formati aktual i kampionatit është i përbërë nga 10 skuadra, të cilat përballen 4 herë në sezon.

Kriza ekonomike ndjehet edhe në sport. Në këtë sezon vetëm 4 skuadra kishin licencimin e UEFA-s. Pas tre skuadrave të para, u kualifikua edhe vendi i 6 pasi Flamurtari nuk kishte licencim dhe Skënderbeu i vendit të pestë është i skualifikuar nga UEFA për 10 vite. Skandali që përfshiu Skënderbeun, rihapi kampionatin i cili dukej i vdekur. Jo rastësisht këtë sezon ka një fitues të ri. Sistemi aktual i kualifikimit në Ligën e Kampionëve apo në Ligën e Europëse bën të vështirë kualifikimin.

Ndërsa, edhe për në Europa League pas eliminimit nga Champions-i, një skuadër shqiptare duhet të përballet me një tjetër me një kundërshtar më të kuotuar. Nëse do të hynte një kompeticioni  i tretë europian atëherë do të garantonte më shumë vazhdimësi, por dyshimet janë nëse përballen skuadra të cilat kanë probleme gjeo-politike”, ishte përshkrimi i Moçiaros.