Eliminoi Kukësin por i druhet Partizanit, trajneri i Karabak: Shqiptarët kanë disiplinë

Trajneri i Karabak, Gurban Gurbanov, ka komentuar sot shortin e turit të parë të Ligës së Kampioneve që ka vënë skuadrën e tij përballë Partizanit. Vitin e kaluar ai ishte në vendin tonë si rival i Kukësit e këtë vit do të luajë përballë kryeqytetasve, në një sfidë të cilën ai nuk e parashikon të lehtë.

“Si zakonisht, di të përballemi me një kundërshtar të vështirë. Klubet shqiptare janë shumë të disiplinuara, do të kemi përballje të vështira, siç e dimë. Ajo skuadër do të punojë me një trajner të ri dhe do jetë një rival me të cilin nuk jemi ndeshur më parë, ndoshta mund të bëjnë edhe transferime të reja. Ne duhet të jemi jashtëzakonisht të kujdesshëm”, tha Gurbanov për faqen e klubit.

Në të njëjtën linjë mendimi ishte edhe kapiteni i Karabak, Rashad Sadigiov. “Do të luajmë dy sfida të vështira ndaj kampionëve të Shqipërisë dhe duhet të tregohemi shumë seriozë dhe të përgatitur. Do të analizojmë kundërshtarët dhe të marrim informacionet që na duhen tani. Duhet të shfaqemi në formë të mirë pasi në Ligën e Kampioneve çdo kundërshtar është i rrezikshëm dhe duhet të përgatitemi mirë që të tregojmë atë lojë që duam”, tha ai. /vipsport.al/