Ekskluzive / Sabjen Lilaj tregon sekretet e Karabak: E vështirë, por kanë një repart ku stonojnë

Skuadra e Karabak do të jetë rivalja e Partizanit në turin e parë të Ligës së Kampioneve, një prej kundërshtarëve më të vështirë në letër për të kuqtë duke parë eksperiencën e tyre ndërkombëtar. Një person që njeh mirë forcën e këtij ekipi është Sabjen Lilaj, i cili ka kaluar vitin e fundit në kampionatin azer me fanellën e Gabala dhe ka luajtur si kundërshtar ndaj kampionëve të Azerbajxhanit.

“Ky është një ekip me shumë kualitet, ka vite në nivele shumë të larta. Karabak është një klub me një buxhet shumë të madh, Ndaj do të jetë një përballje shumë e vështirë për Partizanin”, shpjegon Lilaj në një prononcim për Vip Sport.

Megjithatë, sipas tij edhe Karabak është një ekip i cili mund të ndalet, pasi ka reparte të cilat nuk janë në nivelin e të tjerave. “Siç e përmenda edhe më parë, kanë shumë kualitet, sidomos nga mesfusha dhe para. Ndërsa pika e dobët mund të them që në mbrojtje stonojnë ndonjëherë. Për më tepër, në ekipin e vjetshëm nuk kishin një sulmues goli, por nuk di të them se si është situata e tyre aktualisht në merkato”, zbërthen Lilaj kundërshtarët e Partizanit, të cilët sigurisht nuk duhen nënvlerësuar.

“Pavarësisht se Neftçi bëri një kampionat shumë të mirë në Azerbajxhan, ata pa u shtrënguar shumë prapë arritën të fitojnë titullin. Ndaj Partizanit do t’i duhen dy ndeshje shumë të mira ndaj tyre”, paralajmëroi Lilaj. /vipsport.al/