Ekskluzive/ Kukësi bën afrimin e radhës, akord me një 20-vjeçar

Kukësi është duke bërë një merkato të studiuar. Skuadra e trajnerit Ernest Gjoka po synon që të afrojë lojtarë që kanë spikatur në Superiore, apo dhe të huaj cilësorë, por nuk heqin dorë edhe nga talentet.

Kështu, “VipSport.al” ka mësuar është gjetur akordi dhe pritet që të dalë në stërvitje me kuksianët mesfushori nga Guinea, Oumar Turad Kamara, aktualisht në pronësi të Besëlidhjes, por që mes dy klubeve është gjetur gjuha e përbashkët.

Lojtari është ndjekur nga drejtuesit kuksianë dhe pritet që të kryejë edhe një mini-provë, ndërsa 20-vjeçari nuk është i panjohur në vendin tonë. Ka ardhur për llogari të Luzit 2008, një vit te Besa e më pas dy sezone për lezhjanët ku ka spikatur, e madje në dy vitet e fundit edhe si shënues.

Kamara ka pasur oferta edhe nga Superiorja në verën e shkuar, mirëpo preferoi që të qëndronte më Lezhë për të fituar edhe më shumë eksperiencë dhe duket se tashmë është gati. Kujtojmë që nga skuadra lezhjane kanë dalë edhe Lancinet Sidibe dhe Sekou Kamara që pasi luajtën si titullarë në Vlorë e Durrës tashmë ja lënë radhën një tjetër talenti për t’u konfirmuar në Superiore si Oumar Turad Kamara. /E.S-Vipsport.al/