Dita e parë e Lerda: Pashë skuadër me dëshirë, duhet të jemi të bindur që mund të kalojmë turin

Optimizmi duket qartë në fjalët e Franko Lerda. Trajneri i ri i Partizanit, ka vlerësuar pozitivisht impaktin e tij të parë me skuadrën e kuqe në stërvitjen që ka zhvilluar sot në Slloveni. Në një deklaratë të shpërndarë nga klubi, ai ka treguar ndjesitë e para të kësaj stërvitje, si e sheh shortin e Ligës së Kampioneve si dhe planet që ka për fazën përgatitore të klubit.

Stërvitja e parë – “Sot ka qenë dita ime e parë ku takova  djemtë në fushë. Ishte një takim shumë, shumë pozitiv, i pashë mirë. Punuam mirë, me intensitetin dhe kualitetin e duhur. Kështu që ndjehem i kënaqur dhe më jep besim se pashë një skuadër që ka dëshirë të përmirësohet e rritet. Pashë gjithashtu një grup që ka karakteristikat e duhura që na jep shpresa se do të bëjmë mirë”.

Shorti në Champions – “Kundërshtar të preferuar nuk kisha, se sa hidhet shorti ka diskutime të ndryshme. Por në fund duhet të mendojmë për ndeshjen tonë dhe të shkojmë në ndeshje me përgatitjen e duhur fizike e atletike, teknike, por mbi të gjitha psikologjikisht të bindur se mund të kalojmë turin sepse gjithsesi ndeshej të lehta nuk ka. Kemi besim se do të shkojmë mirë”.

Përgatitjet nëpërmjet miqësoreve – “Miqësore për momentin kemi dy, më datë 23 dhe pastaj me datë 26. Më pas kemi menduar me stafin të shohim se kur mund të bëjmë miqësoren e tretë sepse duhet të menaxhojmë ngarkesat në stërvitje. Kështu që tani duhet të bëjmë këto miqësore që kemi ndaj skuadrave të rëndësishme”. /vipsport.al/