Xhaka fiton Kupën me Bazelin, Ajeti shënon gol dhe kthehet në “ultras”

Taulant Xhaka ka arritur që të sigurojë një trofe në këtë sezon, pasi me Bazelin e tij ia doli që të fitonte Kupën e Zvicrës, duke mundur në finale 2-1 ekipin e Thun. Mesfushori i përfaqësueses shqiptare ishte sigurisht një titullar në ndeshjen e sotme, ku luajti si mbrojtësi i djathtë, por protagonist në fushë ishte një tjetër shqiptar, Albian Ajeti, i cili është kthyer tashmë në idhullin e tifozerisë së klubit zviceran.

Ajeti gjeti golin e avantazhit për skuadrën e tij në minutën e 23-të, ndërsa vuri vazhdimisht në rrezik prapavijën kundërshtare. Bazeli më pas shënoi edhe golin e dytë me Frai, ndërsa rrjeta e Sorgiç në fundin e takimit bëri pak më entuziazmuese luftën deri në vërshëllimën përfundimtare.

Kështu, Xhaka e Ajeti kthyen përsëri Kupën te Bazeli, për të cilin ky ishte trofeu i 13-të në historinë e këtij turneu. Ajeti vendosi ta festonte në një mënyrë shumë të veçantë suksesin, pasi u fut mes fansave të skuadrës së tij dhe pasi mori megafonin në dorë, u kthye në një “kapo-ultras” për disa minuta duke udhëhequr koret e mbështetësve. /vipsport.al/