Formula 1 / Botas bëhet i frikshëm, merr pole-position në Spanjë me diferencë nga Hemilton

Valteri Botas po konfirmohet gjithnjë e më shumë si piloti më i shpejtë i Mercedes dhe këtë e tregoi duke siguruar pole-position në çmimin e Madh të Spanjës duke mundur shokun e tij të skuadrës Luis Hemilton me një diferencë të frikshme prej 0,634 sekondash në xhiron më të shpejtë.

Botas zhvilloi një xhiro mbresëlënëse që në pjesën e parë të kualifikueseve të fundit dhe askush tjetër nuk iu afrua kohës së tij, edhe pse provuan me gomat e buta “Pirelli”. Hemilton tashmë duhet të ketë frikë shokun e skuadrës në luftën për titullin kampion, ndërsa Fetel sheh gjithnjë e më nga larg këtë duel, pasi sot ishte 0,866 sekonda më i ngadaltë se vendi i parë.

Maks Vershtapen është piloti i cili do të niset nga vendi i katërt, pasi arriti të mbante pas tij Ferrarin tjetër të Leklerk, fajtor se doli nga pista gjatë pjesës së dytë të kualifikuesve duke dëmtuar pak makinën e sidomos duke shkatërruar një set gomash. Nga piloti i Ferrarit e më tej, të gjithë kishin më shumë se një sekondë diferencë nga koha e dhuruar nga Botas, i cili duket qartësisht që në këtë sezon do të luftojë për titull me Hemilton dhe aktualisht ka 1 pikë avantazh në kryesimin e renditjes nga kampioni i botës në fuqi. /vipsport.al/