Duhet të zëvendësonte Gent Muçën, mbrojtësi përfundon në kategorinë e katërt braziliane

Uellison Oliveira është një njohje e vjetër për klubin e Tiranës. Mbrojtësi erdhi si një afrim i bujshëm teksa ishte një titullar i rregullt në epokën e Ze Marias. Braziliani shikohej si alternativa e përkryer për të zëvendësuar Gentian Muçën.

Megjithatë, 31-vjeçari asnjëherë nuk u ngrit në nivelin e pritshmërive teksa problemet në mbrojtje ishin evidente, ndërsa u largua pas vetëm 17 paraqitjeve me 24-herë kampionët e Shqipërisë. Pas eksperiencës te Tirana, mbrojtësi u largua në Suedi teksa u transferua te ekipi i Eskilstunës në Ligën e Parë. Por edhe eksperienca në Suedi nuk rezultoi e suksesshme, ndërsa tashmë ish-mbrojtësi i bardhebluve ka firmosur në kampionatin e vendit të tij, në Brazil.

Uellison është shndërruar në lojtarin më të ri të Moto Club. Një skuadër e cila militon në Ligën e Katërt braziliane. Megjithatë, duke parë pamundësinë për të firmosur me një skuadër më cilësore, Uellison ka pranuar të aktivizohet në një ligë inferiore.

/EgiCabeli-VipSport.al/