Revoltohet Sebino Plaku: Po dëmtohemi rëndë edhe pse jashtë ngjarjes, FSHF as që e ka mendjen te ne

Kur kanë kaluar disa javë nga përjashtimi që iu bë Kamzës, futbollistët të cilët kanë mbetur pa skuadër nuk kanë marrë ende një zgjidhje dhe nuk e dinë se çfarë do të bëhet me karrierën e tyre. I ftuar në emisionin ‘Sport News Plus’, kapiteni Sebino Plaku ka folur në lidhje me këtë çështje, ku i revoltuar me atë që po ndodh, është shprehur se të gjithë futbollistët kanë bërë një shkresë ku kërkojnë zgjidhje, por FSHF nuk e ka mendjen te ata.

Ai ka kërkuar që të jepet një zgjidhje për problemin, pasi futbollistët nuk po luajnë dhe kjo i dëmton si fizikisht që largohen shumë nga forma e tyre, ashtu edhe ekonomikisht pasi prej muajsh nuk paguheshin nga klubi, e tani shpresat për të marrë paga janë zero pas përjashtimit të Kamzës.

“Askush nuk e ka mendjen te ne. Nuk e ka FSHF mendjen te ne jo më ekipet. Jemi në pritje të një përgjigje. Kemi bërë një kërkese të gjithë lojtarët e ekipit. Janë lojtarët ata që po vuajnë. Prisnim që të merrnim një përgjigje. Çdo ditë që kalon është shumë e vështirë. Përveç dëmit financiar, është edhe ai profesional. Ekipet do ta kenë të vështirë t’i hedhin sytë nga lojtarët e Kamzës.

Unë jam koherent me të gjithë ngjarjet. Rasti jonë është ekstrem. Mosaktivizimi i lojtarëve është fatkeqësi e madhe. Lojtarët u munduan të ishin jashtë ngjarjes, janë ata që po e vuajnë me tepër se çdo kush”, tha Plaku. /VipSport.al/