FOTO/ Pas përjashtimit nga Superiorja nis edhe shkrirja, lojtarët e Kamzës braktisin Shqipërinë

Pak javë më parë, Kamza u përjashtua nga çdo turne futbollistik në vend dhe sezonin e ardhshëm do ta nisë nga Kategoria e Dytë. Kjo ka bërë që shumë futbollistë të mbeten mes katër rrugëve dhe ta kenë të vështirë të gjejnë një skuadër tjetër në verë, pasi është një kohë e gjatë që nuk luajnë.

Në këto kushte, futbollistët po stërviten individualisht me trajnerë personalë dhe të tillë kanë qenë Bruno Arrabal e Gabriel Martinena të cilët janë stërvitur nën kujdesin e ish-mbrojtësit Roland Peqini. Kaq ka zgjatur stërvitja e tyre individuale pasi të dy futbollistët kanë vendosur të largohen nga Shqipëria në drejtim të vendlindjes së tyre.

Brazili për Arrabal dhe Argjentina për Martinenën kanë qenë destinacionet e dy futbollistëve të cilët largohen nga Shqipëria me kujtime jo të mira. Në këtë mënyrë, duket se Kamza ka nisur të shpërbëhet pak nga pak dhe pritet vetëm fillimi i sezonit, për të kuptuar nëse do ta rinisë apo jo kampionatin nga Kategoria e Dytë. /Erjon Allaraj-VipSport.al/