FOTO/ Pa ekip prej javësh, mbrojtësi rikthehet dhe stërvitet me Kukësin

Pak javë më parë, Komisioni i Disiplinës vendosi të përjashtonte Kamzën dhe ta dërgonte në Kategorinë e dytë, aty ku do të rinisë garën sezonin e ardhshëm. Kjo ka bërë që të gjithë futbollistët të jenë pa një skuadër dhe të kërkojnë një alternativë për të qenë aktivë në stërvitje e për të mos humbur nga rendimenti i tyre.

Një ndër to, ishte qendërmbrojtësi Harallamb Qaqi i cili u largua në muajin janar nga Kukësi, duke firmosur me Kamzën për më shumë minuta dhe më shumë mundësi aktivizimi. Aventura e tij me kamzalinjtë nuk ka shkuar mirë pasi tashëm i duhet të stërvitet diku tjetër pas përjashtimit të Kamzës.

Kështu, Kukësi i ka hapur derën mbrojtësit dhe prej ditësh, ai stërvitet me verilindorët. Ish-mbrojtësi i Kukësit që erdhi me bujë në verë, por që u largua pa lënë shumë gjurmë do të duhet të gjejë një skuadër të re në verë, duke qenë se Kamza militon në Kategorinë e Dytë dhe me shumë gjasa, mund të firmosë përsëri me Kukësin. /Erjon Allaraj-VipSport.al/