FOTO/ Detaje historike dhe kujtime të Solskjaer, ndryshon fanella e Mançester Junajtid

Mançester Junajtid ka qenë këtë sezon një nga skuadrat që ka arritur të befasojë jo pak me ardhjen e Solskjaer në krye të stolit dhe paraqitjet e bëra me trajnerin norvegjez, kanë bërë që atij t’i ofronte një kontratë trevjeçare. Vetë Solskjaer, ka kujtime të shumta me fanellën e Mançester Junajtidit edhe si futbollist, e tani synon t’i përsërisë si trajner.

Këto kujtime, përveç se në memorien e trajnerit, do të jenë tashmë të stampuara edhe në fanellë. Një nga faqet më të njohur në internet që merret me publikimin e fanellave për sezonet e ardhshme, ‘Todo Sobre Camisetas’ ka publikuar fanellën e ‘djajve të kuq për sezonin e ardhshëm dhe shihen shumë ndryshime në të. Fanella do të jetë nga të vjetrat, ku do të kujtohet sezoni 1999 kur Mançesteri fitonte titullin kampion në javën e fundit duke mundur Totenhemin dhe duke qëndruar 1 pikë para Arsenalit.

Logoja e ekipit që deri më tani ka qenë e kuqe dhe e verdhë, do të jetë e zezë me nuanca gold, ndërkohë që do të ketë të stampuar edhe data e minuta me rëndësi. “16.05.1999” ka qenë data kur Junajtid fitonte Premier Ligën, “22.05.1999”, ka qenë data kur Junajtid fitonte FA Cup dhe “26.05.1999” është data kur Mançesteri ka fituar Championsin duke kompletuar kështu tripletë atë sezon.

Këto data do të jenë të stampuara në fanellë, si edhe dy minutazhe të ndryshme. “90+1’” është minuta kur Mançester Juanjtid realizonte golin e avantazhit atë kohë ndaj Bajernit në finalen e Championsit, ndërkohë që “90+3’” është minuta kur Solskjaer vuloste takimin, gjë e cila do të jetë e stampuar gjithashtu. /Erjon Allaraj-VipSport.al/