Nga “Shqipëria kokëfortë” te “stadiumi me fat”, Federata Skoceze paralajmëron tifozët

Federata Skoceze ka paralajmëruar tifozët se nuk pret një “shëtitje” në ndeshjen ndaj Shqipërisë në Shkodër, por një sfidë të luftuar dhe jo vetëm si pasojë e mungesave që ka në përbërje. Skocezët kanë bërë bilancin e dy ekipeve në programin e zakonshëm para ndeshjes së fundjavës.

“Lojtarët dhe stafi teknik nuk kanë asnjë dyshim se çfarë lloj performance i nevojitet përballë një skuadre kokëfortë të Shqipërisë”, shkruhet në këtë program që në rreshtat e parë, duke lënë të kuptohet se do të jetë një sfidë mjaft e vështirë. “Vendasit do të jenë një test i vështirë për pretendimet e Skocisë, pasi janë treguar të vështirë për t’u thyer edhe në takimin mes dy skuadrave më parë këtë vit”, vijon në shkrimin e publikuar në faqen e internetit të Federatës Skoceze të Futbollit.

Aty shpjegohet se ndeshja do të luhet në Shkodër, një stadium i cili i sjell kujtime të lumtura. Kjo, pasi pak muaj më parë, në këtë stadium kombëtarja e femrave të Skocisë mundi 2-1 atë shqiptare dhe siguroi kualifikimin në Botërorin 2019.

Ndërkohë, ajo tregon edhe lojtarët më të rrezikshëm të kuqezinjve. “Eros Grezda po bëhet një emër i njohur për fansat e futbollit skocez, pasi ka firmosur me Rejnxhërs në verë. 23-vjeçari shënoi 2 herë në fitoren e fundit 7-1 të skuadrës së tij ndaj Madhëruell dhe do të kërkojë të shënojë një tjetër gol në arenën ndërkombëtare. Mbrojtësi i Hajduk Split, Ardian Ismajli, është gati të debutojë në arenën ndërkombëtare, ndërsa lojtari me aftësi teknike, Taulant Xhaka, do të udhëheqë mesfushën shqiptare”, shkruhet në programin e Federatës Skoceze. /vipsport.al/