Mesatare e frikshme/ Gol çdo 13.5 minuta dhe shënuesi më i mirë me 3 ndeshje si zëvendësues

Në Gjermani po flasin të gjithë me superlativa për sulmuesin spanjoll Pako Alkaser, sepse më mirë se kaq nuk mund të ketë. Ai shënoi 3 gola në ndeshjen Dortmund-Augsburg, ku hyri në fushë gjysmë ore para fundit. Asgjë e çuditshme për këtë lojtar, që 6 gola i ka shënuar në 81 minuta në total.

Spanjolli është shënuesi më i mirë i Bundesligës, por sulmuesit e tjerë kanë luajtur shumë më shumë minuta se ai në këto 7 javë të kampionatit. “E pabesueshme, Pako është fenomenal, pasi hyn në fushë si zëvendësues dhe shënon 3 gola. Çfarë duhet të kërkojmë më shumë?”, – ka thënë pas ndeshjes së fundit kapiteni i Borusias, Marko Rojs. Dhe Pako mund të bëjë më shumë, nëse luan rregullisht.

Nga nëntori i 2016-ës, sulmuesi spanjoll e ka luajtur një ndeshje deri në fund në vetëm tre raste. Mes problemesh muskulore dhe transferimit pasi kishte nisur kampionati (në Gjermani merkatoja është mbyllur më 31 gusht), këtë sezon Pako ka hyrë në fushë në 3 ndeshje, duke luajtur respektivisht 23, 27 dhe 31 minuta. Kështu, ai shënon mesatarisht çdo 13.5 minuta. Nëse vazhdon me këtë mesatare edhe në 27 ndeshjet e tjera të Bundesligës, duke luajtur 2430 minuta, i bie që të shënojë 180 gola të tjerë, për ta mbyllur sezonin me 186 gola.

E pamundur të ndodhë kjo gjë, por në Dortmund po dëfrehen dhe po ëndërrojnë me të. “Mesatarja e tij e golave nuk është rastësore, ka teknikë dhe gjuajtje të saktë. Duket sikur në portë dërgon gurë dhe jo topa”, – është shprehur Zorc, drejtori sportiv i Borusias.

Duke parë këtë paraqitje të sulmuesit, Luis Enrike ka vendosur ta grumbullojë me Spanjën për ndeshjet me Anglinë dhe Uellsin. Alkaser nuk grumbullohej me kombëtaren që në mars të 2016-ës. Sulmuesi kaloi në Dortmund në formë huazimi nga Barcelona për 2 milionë euro. Nëse gjermanët vendosin ta blejnë, duhet të paguajnë 25 milionë euro për të. “E imagjinoj veten me këtë fanellë edhe në të ardhmen”, – ka thënë vetë sulmuesi Pako Alkaser. /Vipsport.al/F.R