Kaos në Belgjikë, klubet e Abazajt dhe Gurit akuzohen për trukime e mashtrim financiar

Kampionati belg i futbolli kalon në kaos të plotë, pasi Prokuroria e Përgjithshme në këtë vend ka urdhëruar sot kontrolle të shumta dhe arrestime në klube të njohura n vend, shtëpitë e zyrtarëve të klubeve apo gjyqtarëve.

Sipas prokurorisë, nga hetimet për mashtrim financiar rreth transferimeve të futbollistëve ku është evituar pagesa e taksave, ka dalë në skenë edhe tentativa e manipulimit të ndeshjeve të sezonot të kaluar. Ndaj pas një hetimi disamujor sot është vendosur ndërhyrja që ka përfshirë klube të ndryshme në Belgjikë, mes të cilëve edhe Anderlehtin e Kristal Abazajt dhe Ostenden e Sindri Gurit.

Nuk dihet ende nëse klubet në fjalë akuzohen vetëm për mashtrime financiare apo edhe për trukimet e ndeshjeve, por policia sot ka bastisur zyrat e klubeve duke marrë kompjuterë dhe dokumente nga të gjithë. Sipas informacioneve të para, ka dhjetëra të arrestuar mes zyrtarë klubesh, lojtarë, trajnerë, gjyqtarë, avokatë e menaxherë, pa harruar edhe gazetarë të cilët ishin në dijeni të ngjarjeve e bashkëpunonin.

Operacioni është shtrirë edhe në vende të tjera përfshirë edhe Maqedoninë e Serbinë, pasi bëhej fjalë për një rrjet të madh kriminal që kryente aktivitete të paligjshme. /vipsport.al/