Vazhdon legjenda e “El Maestro” Tabarez, rinovon trajneri që emocionoi gjithë botën

Oskar Tabarez do të vazhdojë të jetë në drejtimin e Uruguait me objektivin për ta dërguar në Botërorin e Katarit 2022. Pritet vetëm zyrtarizimi por mediat kryesore në Amerikën e Jugut kanë bërë të ditur se nuk ka diskutime që në ditët në vijim, “El Maestro” do të hedhë firmën në kontratën e re për një cikël katërvjeçar.

Tabarez ktheu përsëri në një superfuqi Uruguain që nga momenti kur mori drejtimin e kësaj përfaqësueseje në vitin 2006. Kombëtarja hodhi hapa të rëndësishëm para, duke shkuar deri në katërshen më të mirë në vitin 2010. Për këtë arsye, pakkush kishte dyshime që Tabarez do të vazhdonte në stolin e kësaj përfaqësueseje edhe për shumë vite.

Megjithatë, këto dyshime lindën pasi u mësua se ai vuante nga një sëmundje e rëndë dhe pak nga pak, humbte aftësinë për të kontrolluar gjymtyrët e tij. Gjatë Botërorit 2018, Tabarez u pa të përdorte paterica në pankinë, apo edhe një motor për invalidë gjatë seancave stërvitore. Por pasioni me të cilin shpërthente nga pankina, pavarësisht gjendjes së tij fizike, i emocionoi të gjithë dhe padyshim që ai ishte një prej emrave më të spikatur të Rusi 2018.

Firma e tij në kontratën e re do të jetë prova se kjo sëmundje nuk mposht dot Tabarez, i cili vlerësohet tashmë nga të gjithë si nj prej emrave më të mëdhenj të trajningut botëror. /vipsport.al/