Shansi i Arlind Ajetit për t’u kthyer protagonist, e ndihmoi një… menisk

Arlind Ajeti ka një mundësi të mirë për t’u kthyer protagonist në futbollin europian, pas firmës që hodhi dje në kontratën me klubin e Grasshopers të Zyrihut, për të vazhduar atje karrierën e tij. Për futbollistin shqiptar, kjo u kthye në zgjidhjen më ideale të problemit, në një moment kur nuk po gjente skuadër për t’u aktivizuar dhe gjithçka erdhi për shkak të një dëmtimi.

Pak ditë më parë në një miqësore që Grasshopers po zhvillonte me një ekip amator, qendërmbrojtësi brazilian Nathan, i huazuar nga Palmeiras, pësoi një dëmtim të rëndë në gju. Pas testeve u kuptua se ai kishte një dëmtim në menisk dhe iu nënshtrua operacionit që do ta linte për 6 muaj larg fushave të lojës.

Klubi filloi me shpejtësi të kërkonte një zëvendësues dhe alternativa më e mirë që iu shfaq para ishte ajo e Ajetit, lojtar i lirë dhe në kërkim të një skuadre. Klubi i Grasshopers është kthyer shpesh në strehën e futbollistëve shqiptarë dhe në janar, mbajti disa javë për stërvitje Naser Alijin i cili asokohe ishte pa skuadër.

Akordi mes palëve u gjet shumë shpejt, pasi edhe Ajeti ishte i interesuar të kthehej në fushën e lojës dhe firma në kontratë e ndihmon të kthehet në fushë me klubin, por edhe me Kombëtaren kur dikur cilësohej titullar i paprekshëm në prapavijë. /vipsport.al/