Surprizat ruse mbarojnë te penalltitë, Kroacia në gjysmëfinale (VIDEO)

Kroacia ka arritur të shkruajë historinë, duke kaluar për herë të dytë në historinë e saj në gjysmëfinalet e Kupës së Botës. Skuadrës së drejtuar nga Zlatko Daliç i janë dashur përsëri penalltitë për të kaluar turin, duke mposhtur këtë radhë vendasit e Rusisë të cilët u dorëzuan nga pika e bardhë, nga ku pak ditë më parë eliminuan Spanjën.

Ndeshja mes Kroacisë dhe Rusisë ka qenë padyshim shumë me entuziazmuese se ajo e pasdites mes Anglisë dhe Suedisë, me dy skuadra që nuk kursyen asnjë gjë në fushën e lojës duke dhuruar spektakël e raste para portës. Kroatët dukeshin me konkretë në fillim por ishin rusët ata që shënuan të parët me Çerishev i cili goditi në mënyrë të shkëlqyer për të kaluar të skuadrën vendase në avantazh.

Megjithatë, avantazhi i rusëve zgjati shumë pak, pasi para fundit të pjesës së parë ishte Kramariç që barazoi shifrat me një goditje të shpejtë me kokë, për të mbyllur fraksionin e parë të lojës me rezultatin 1-1.  Pjesa e dytë dhuroi traste të shumta nga të dy skuadrat, me Perisiç që iu afrua shumë golit duke goditur edhe shtyllën. Por askush nuk arriti të tunde rrjetën dhe ekipet shkuan në shtesa për të zgjidhur fatin e ndeshjes.

Kroacia dukej në kontroll në pjesën e parë shtesë dhe me meritë gjeti golin e avantazhit me anë të Vida. Por kur dukej se gjithçka kishte mbaruar, Fernandes barazoi rezultatin për të çuar duelin në gjuajtjet e penalltive, pikërisht ato që kishin sjellë dy skuadrat në çerekfinalet e turneut.

Nga pika e bardhë kroatët u treguan më të saktë, duke fituar 4-3 përballë vendasve për të cilat ndikuan gabimet e Smolov dhe Fernandes, duke i dhënë fund ëndrrës ruse për të kaluar në fazën tjetër të turneut.

Rusi-Kroaci 2-2 (Çerishev 30′, Fernandes 115’/ Kramariç 39′, Vida 101′)

Penalltitë 3-4
(Smolov – gabon, Xhagoev – gol, Fernandes – gabon, Ignasheviç – gol, Kuziaev – gol)
(Brozoviç – gol, Kovaçiç – gabon, Modriç – gol, Vida – gol, Rakitiç – gol)

Rusia: Akinfev, Fernandes, Kutepov, Ignasheviç, Çerishev (67′ Smolov), Kuziaev, Zobnin, Kudriashov, Golovin (102′ Xhagoev), Samedov (54′ Erokhin), Dzhyba (79′ Gazinski).
Trajner: S. Çerçesov

Kroacia: Subashiç, Vrsaljko (97′ Çorluka), Striniç (74′ Pivariç), Lovren, Vida, Perisiç (63′ Brozoviç), Rakitiç, Kramariç (88′ Kovaçiç), Modriç, Manxhukiç, Rebiç.
Trajner: Z. Daliç

KV: Lovren, Striniç, Vida, Pivariç