Presidenti i Federatës së Gjermanisë e pranon hapur: Gabuam me çështjen e Ozilit!

Presidenti i Federatës Gjermane të Futbollit, Reinard Grindel, ka folur për çështjen e mesfushorit Mesut Ozil, i tërhequr tashmë nga kombëtarja pas shumë e shumë polemikash, sidomos pas deklaratave të tij për racizëm.

Grindel ka pranuar se është vepruar gabim në këtë histori, duke iu referuar ngjarjes që lidhet me foton e Ozilit me Presidentin e Turqisë, Erdogan. “Po, ka pasur një abuzim dhe slogane raciste për atë foto, – ka thënë Grindel. – Si president, duhej ta kisha thënë me forcë atë që është evidente për mua personalisht dhe për ne si federatë: çdo deklaratë e karakterit racist është e patolerueshme dhe e papranueshme”.

Ozil deklaroi largimin nga kombëtarja gjermane të dielën e kaluar dhe kritikoi Federatën për mënyrën si e ka trajtuar: “Në sytë e Reinard Grindel, presidentit të Federatës, unë jam gjerman kur fitojmë dhe një emigrant kur humbim”, – tha atëherë mesfushori me origjinë turke. / Vipsport.al