Trajneri i Brazilit fajëson gjyqtarin: Faulli ndaj Miranda ishte i qartë

Te Brazili, shkaku i barazimit të sotëm ndaj Zvicrës ishte vetëm vendimi i gjyqtarit kryesor për të akorduar golin e skuadrës zvicerane. Vetë trajneri Tite e ka cilësuar faullin ndaj Miranda si shumë të dukshëm e si rrjedhojë, të pakuptueshëm vendimin për të akorduar atë gol në fillimin e pjesës së dytë.

“Do të dëshiroja të përgjigjesha për pyetje të tjera sepse kështu duken si shfajësime për barazimin. Por shtyrja ndaj Miranda është shumë e qartë. Shumë e qartë! Pastaj ajo për penalltinë është çështje interpretimi, por ajo e golit jo. Miranda më tha se duhej të ishte rrëzuar që të theksonte faullin, por i thashë ‘jo’, se nuk i dua simulimet”, theksoi trajneri.

“Sigurisht që pritshmëria ime ishte fitorja, nuk jam i lumtur me rezultatin. Duhet të jemi të qetë e të shfrytëzojmë më mirë rastet, pasi krijuam 20 gjuajtje dhe pjesa më e madhe ishin jashtë kuadratit. Brazili prodhon lojë dhe dominuam, edhe pse u goditëm psikologjikisht nga goli për disa minuta’, deklaroi Tite. /vipsport.al/