Fation Shehu: Gjyqtarët po përdoren për të shlyer borxhet e fushatës së FSHF

I ftuar në panelin e studios së emisionit “Rubrika Sportive” në RTSH, drejtori i “Vipsport.al”, Fation Shehu ka folur për çështjen e gjykimit në kampionatin shqiptar.

“Arbitrat janë ata që duhen parë me dhimbje për atë që kanë marrë përsipër.

Ata janë edhe banda e ekzekutorëve për strategjitë e zyrave të FSHF.

Jemi në fazën që po shlyhen borxhet e fushatës elektorale.

Presidenti i Laçit është lobuesi më i madh i Armand Dukës në fushatën elektorale për kreun e FSHF-së. Nuk u përfaqësua me veten e vet, por garantoi tre vota të stafit të tij. Përveç votës së Laçit që e kishte Duka të sigurt, për ekipin e Burrelit votoi zv.trajneri i Laçit, ndërsa për shoqatën e Lezhës votoi zv.trajneri tjetër i Laçit.

Kjo duhet hetuar nga organet kompetente. Si mundet që një kandidat për president për FSHF të premtojë për këmbim të votës, pozicionin e renditjes përfundimtare të ekipeve në kampionat? Si mund të premtojë që mund të dërgojë një ekip në Europë?

Këta arbitra janë caktuar se kush dëgjon urdhrat e kush jo. Nëse këta gjyqtarë nuk janë të bindur për të qenë pjesë e bandës së ekzekutorëve, nuk janë pjesë e elitës së futbollit shqiptar.

Në këtë javë kishte katër ndeshje me gabime të rënda arbitrare. Jo rastësisht. Pretendohet se janë bërë llogaritë në letër se cili ekip do të fitojë dhe cili do të humbë. Uroj që këto thashetheme të mos jenë të vërteta. Por duhen hetuar, sigurisht.

Për mendimin tim, presidentët duhet të ngriheshin në Asamble për gabimet e gjyqtarëve.

Më dhimbsen gjyqtarët. Sepse, nëse nesër ngrihet hetim, nuk faktohen ata që dhanë urdhrat, por ata vetë arbitrat. Këta gjyqtarë po shkatërrojë edhe veten, jo vetëm klubet, me vendimet e tyre.

Kam dëgjuar që ka hetim për këto çështje, por nuk dua të zbuloj më shumë për arsye të konfidencës hetimore. Disa gjyqtarë janë edhe në përgjim, por ata nuk e dinë.

Ai që i ka garantuar se do t’i mbrojë, nuk do t’i mbrojë këta gjyqtarë, por do t’i hedhë poshtë direkt”, tha Fation Shehu në emisionin “Rubrika Sportive” në RTSH.